10 правілаў добрага навучання


Learning-How-to-Learn-Logo-with-text

Вучыцца — гэта маё. Прайшоўшы нядаўна чарговы курс на Coursera, не магу не падзяліцца карыснымі парадамі пра тое, як эфектыўна вывучыць што заўгодна.

Поўная назва курса — «Learning How to Learn: Powerful mental tools to help you master tough subjects«, выкладалі ў асноўным Барбара Оклі і Тэррэнс Сейноўскі з Каліфарнійскага ўніверсітэту Сан-Дыега.

Да большасці відэа ёсць субтытры па-ангельску,  партугальску, в’етнамску, гішпанску, арабску, галандску, кітайску, па-руску і па-украінску. Цалкам перакладзеная версія існуе па-партугальску.

Увесь курс разлічаны на 4 тыдні, складаецца з 4 гадзін відэа, 3 гадзін заданняў і 3 гадзінаў бонуснага матэрыялу — інтэрв’ю з пісьменнікамі, навукоўцамі, паліглотамі, блогерамі, якія дзеляцца сваімі парадамі па эфектыўным навучанні.

Да справы. Чытай хутчэй 10 правілаў добрага навучання з кніжкі Барбары Оклі ды вывучай тое, што даўно хацелася.

 

  1. Прыпамінай. Прачытаўшы старонку, закрый яе і паспрабуй узгадаць галоўныя ідэі. Выдзяляй і падкрэслівай у тэксце паменей, гэта вельмі расслабляе мозг і стварае ўражанне, што выдзеленае — ужо ў галаве, хаця гэта не так.
  2. Тэстуй сябе. Па ўсім вывучаным. Заўжды. Карткі — твае верныя сябры.
  3. Разбівай задачы на часткі (chunks). Калі разбіць праблему на часткі і засвоіць кожную частку да ўзроўню аўтапілота, то далей вырашэнне іншых падобных праблем будзе прыходзіць у галаву імгненна, быццам з падсвядомасці.
  4. Расцягвай паўтарэнне ў часе. Размяркоўвай навучанне любой дысцыпліне патрошку на кожны дзень, як спартовец. Твой мозг — гэта той жа мускул, яму таксама трэба дазаваныя нагрузкі.
  5. Чаргуй розныя тэхнікі вырашэння праблем. Ніколі не сядзі доўга над праблемай, выкарыстоўваючы толькі адзін падыход яе вырашэння: пасля нейкага этапу ты апынешся ў тупіку паўтарэння. Чаргуй розныя падыходы і розныя праблемы. Паспрабуй паўтараць тэмы да іспыту ў рандомным парадку, а яшчэ лепей — міксуй таксама і розныя прадметы, напрыклад, главу з матэматыкі, а потым — ангельскія дзеясловы. Каб вучыцца эфектыўней, пішы ад рукі (каб лепш асядала ў галаве) праблему з аднаго боку карткі, і вырашэнне — з іншага. Можаш таксама паспрабаваць разгортваць кніжку на любой старонцы і спраўджваць, ці можаш узгадаць, пра што ідзе размова.
  6. Рабі перапынкі. Вучыцца патрошкі кожны дзень нашмат лепей, чым вучыцца «запоямі». Калі нешта не ідзе, зрабі перапынак, каб іншыя часткі твайго мозгу маглі падключыцца і вырашыць праблему, пакуль ты будзеш займацца іншай задачай, у фонавым рэжыме.
  7. Тлумач і праводзь простыя аналогіі. Калі ніяк не можаш справіцца з задачай, паспрабуй патлумачыць яе змест для сябе так, быццам табе 10 год. Аналогіі таксама дапамагаюць, напрыклад параўнаць элеткрычны ток і патокі вады. Пры гэтым лепей не проста прагаварыць такое тлумачэнне пра сябе, а патлумачыць камусьці ці нават напісаць. Ці нават запісаць на відэа, чаму б і не?
  8. Сканцэнтруйся. Павыключай усе дэвайсы, пастаў таймер на 25 хвілін, і пагрузіся ў адну тэму. Пасля 25 хвілін напружанай працы зрабі сабе маленькі падаруначак. Як лёгка гэта б ні здавалася, гэта рэальна дапамагае рабіць прагрэсс у навучанні.
  9. Спачатку з’еш жабу. Пачынай дзень з выканання самай складаннай задачы, пакуль маеш свежы розум і сілы.
  10. Выкарыстоўвай ментальны кантраст. Уяві, с чаго ўсё пачыналася і кантраст з той марай, да якой цябе прывядзе навучанне. Павесь на сцяну выяву або фразу, якія б нагадвалі пра гэтую мару. Гэта можа вельмі выручыць, калі з’явяцца праблемы з матывацыяй.

Поспехаў у навучанні! У наступны раз распавяду пра 10 правілаў дрэннага навучання, а пакуль — засвойвай добрыя!

 

Глядзіце таксама: