• 22.04.2016
• ЗШАЦікавосткі

• Час чытання: 5 хвілін

---

Каця Ліпніцкая адмыслова для Adukacyja.info зрабіла падборку лепшых кінашколаў, якія ўжо сёння рыхтуюць наступнае пакаленне талентаў у кінаіндустрыі. Таму, калі вы марыце зняць кіно, паехалі!

Частка 1. Амерыка

Калі вам падабаецца галівудскае кіно, шырокі пракат і вялікія касавыя зборы, то вам дакладна ў ЗША.

• Школа кінематаграфічнага мастацтва Ўніверсітэта Паўднёвай Каліфорніі (University of Southern California School of cinematic arts)
• Сайт: cinema.usc.edu, cinema.usc.edu/scholarships 

Адзін з самых вядомых і прэстыжных універсітэтаў у кінаіндустрыі. З’яўляецца самым старым прыватным універсітэтам Амерыкі (кінашколу заснавалі ў 1929 годзе), але разам з гэтым заўсёды застаецца прагрэсіўным ў навучанні: новыя ідэі і тэхналогіі кінаіндустрыі тут даследуюць яшчэ да таго, як пра іх дазнаецца Галівуд. Дзякуючы таму, што школа знаходзіцца ў самым сэрцы Галівуду, тут працуюць лепшыя выкладчыкі ў галіне.

Кошт навучання – 49 000 $ на год. Ёсць стыпендыі, якія цалкам кампенсуюць гэтую суму.

Спіс вядомых выпускнікоў універсітэта Паўднёвай Каліфорніі такі доўгі, што можна ўпэўнена сказаць – у здымках любога галівудскага фільму ўдзельнічае некалькі студэнтаў гэтага ўнівера. Некалькі імёнаў: Джордж Лукас (Індыяна Джонс, Зорныя войны), Даг Лайман (Ідэнтыфікацыя Борна; Містер і міссіс Сміт), Ніл Морыц (Жорсткія гульні, серыя “Фарсаж” ды іншы), Брайан Сінгер (Людзі Ікс, Доктар Хаус).

• Амерыканскі інстытут кінамастацтва American Film Institute (AFI)
• Сайт: afi.com, afi.com/conservatory/financialaid

Самая вядомая ў Лос-Анджэлесе (заснавана ў 1967 годзе) школа, у якой цягам года ладзяцца кінафестывалі і зорныя мерапрыемствы. Асноўны акцэнт тут робіцца на візуальных тэхніках і творчым самавыяўленні студэнтаў.

Працэс навучання максімальна набліжаны да рэальнай здымачнай пляцоўкі. Студэнты дзеляцца на групы і здымаюць фільмы пад кіраўніцтвам адмыслоўцаў з кіна- і тэлевізійных супольнасцей.

Кошт навучання – 48 676 $ на год, але ёсць стыпендыя.

Спіс вядомых выпускнікоў: Дэвід Лінч (Малхоланд Драйв, Сіні аксаміт), Даррэн Аранофскі (Рэквіем па мроі, Чорны лебедзь), Энн Гарфіна (прадзюсар “Паўднёвага парка”).

• Інстытут мастацтваў Каліфорніі California Institute of the Arts (CalArts)
• Сайт: calarts.edu, calarts.edu/financial-aid

Школа кіно і відэа CalArt была заснаваная Уолтам Дыснэем у 1966 годзе, зараз гэта альма матэр для шматлікіх таленавітых аніматараў і рэжысёраў Галівуду. CalArt прапануе праграмы ў галіне кіно і відэа, анімацыі, музыкі, танца, тэатра і лялечнага тэатра, пісьма. Студэнты атрымоўваюць інтэнсіўную прафесійную падрыхтоўку ў сваёй сферы, але без фіксаваных абмежаванняў у адной спецыяльнасці.

Асноўнае адрозненне гэтай школы – міждысцыплінарны характар, які, па меркаванні Дыснэя, дапамагае знайсці і развіць свой талент: “Студэнты павінны мець магчымасць вывучаць увесь спектр мастацтваў. Магчыма, музыка зразумеў бы, што ён больш здольны ў кіно, і наадварот. Гэта прафесійная школа, якая дае сваім студэнтам не толькі добрую падрыхтоўку ў канкрэтнай галіне, але і максімальна шырокі спектр для мастацкага росту і экспрэсіі”.

Кошт навучання – 43 400$ на год ці стыпендыя. Галоўнае адрозненне школы ад астатніх амерыканскіх ВНУ – вялікая колькасць стыпендый, паколькі адзінае, што важна падчас паступлення ў CalArts – гэта талент, як казаў сам Дыснэй.

Пералік вядомых выпускнікоў: Цім Бёртан (Кашмар перад “Калядамі”, Труп маладой і інш), Эндру Стэнтан (У пошуках Нэма), Брэд Бёрд (Суперсямейка).

• Школа мастацтваў Нью-Ёркскага ўніверсітэта NYU Tisch School of the Arts
• Сайт: tisch.nyu.edu

Школу мастацтваў заснавалі ў 1965 годзе, у дадзены момант з’яўляецца адной з вядучых тэатральных школаў ЗША. Гэта пляцоўка для мастакоў, дзеячоў мастацтва і творчых прадпрымальнікаў. У навучанні аб’ядноўваюцца тэхнічная падрыхтоўка прафесійных школаў з акадэмічнымі рэсурсамі буйнога ўніверсітэта.

Кошт навучання – 25 093 $ ці стыпендыі.

Вядомыя выпускнікі: 10 выпускнікоў ЦІШ былі намінаваныя на прэмію “Оскар”, сярод іх Марцін Скарсэзэ (Волк з Уол-стрыт, Авіятар), Вудзі Ален (Эні Хол, Манхэтан), Джоэл Коэн (Вялікі Лебоўскі, Бартан Фінк).

***

Дзе павучыцца мастацтву кіно ў Еўропе, Азіі, Мексіцы ды Індыі, чытайце ў наступных выпусках.

Пераклад з рускай Любоў Каспяровіч