Навучальны курс “Сакрэтны код: інфармацыйныя жанры журналістыкі” запрашае журналістаў-пачаткоўцаў.
Навіны застаюцца самым запатрабаваным таварам СМІ ў эпоху інтэрнэта. «Запакоўваецца» гэты тавар звычайна ў тры асноўныя жанры: навіна, рэпартаж, інтэрв’ю. Менавіта яны інфармуюць грамадства, што, дзе, калі і як адбылося, і хто галоўны стваральнік альбо герой падзеі.
Гэта не так проста: здабываць для навінаў факты, што не ляжаць на паверхні, ствараць «эфект прысутнасці» ў рэпартажах і падчас інтэрв’ю пачуць менавіта тое, што прывабіць чытача.
Як зрабіць свой «тавар» унікальным, якраз і будуць вучаць удзельнікі падчас арыентаванага на набыццё практычнага досведу курсу «Сакрэтны код. Інфармацыйныя жанры журналістыкі» — для тых, хто толькі вучыцца журналістыцы, аднак мае вялікае жаданне стаць прафесійным рэпарцёрам.
Пасля заканчэння курса слухачы будуць ведаць:
- дзе і як шукаць інфармацыю;
- чым адрозніваюцца інфармацыйныя жанры ад аналітычных і мастацка-публіцыстычных;
- што такое навіна і як журналіст павінен будаваць сваю «піраміду»;
- як здабыць эксклюзіў падчас прэс-канферэнцыі;
- якія пытанні «выстрэльваюць» і як здабыць інфармацыю ў самага складанага суразмоўцы;
- структуру рэпартажу і чым дасягаецца «эфект прысутнасці»;
- як скарыстацца навіной шматгадовай даўніны для стварэння эксклюзіўнага журналісцкага прадукту сёння.
Пасля заканчэння курсу слухачы будуць умець:
— збіраць інфармацыю і пісаць навіны;
— карыстацца прафесійнымі прыёмамі для стварэння «эфекту прысутнасці» ў рэпартажы;
— карыстацца тэхнікай пастаноўкі пытанняў і стратэгіі інтэрв’ю, а таксама працаваць са складанымі суразмоўцамі і ў складаных сітуацыях.
Да ўдзелу запрашаюцца:
- журналісты-пачаткоўцы;
- выпускнікі факультэтаў журналістыкі альбо школ маладога журналіста;
- студэнты з Мінска і рэгіёнаў.
Удзельнікаў чакаюць восем майстар-класаў ад уласных карэспандэнтаў міжнародных агенцтваў навін, а таксама вядомых беларускіх журналістаў.
Лепшыя з навучэнцаў па выніках курса атрымаюць магчымасць удзелу ў семінары за мяжой у верасні 2016 года.
Курс «Сакрэтны код. Інфармацыйныя жанры журналістыкі» распачнецца 28 траўня і скончыцца 16 ліпеня. Ён складаецца з васьмі заняткаў у Мінску і майстар-класа замежнага трэнера ў Вільні, які пройдзе ў верасні.
Заняткі будуць праводзіцца па суботах з 11:00 да 14:00.
Як падацца
Заяўкі на ўдзел у навучальным курсе прымаюцца па электроннай пошце на е-адрас baj@baj.by (з пазнакай «Information») да 24 траўня.
Заяўка павінна ўтрымліваць:
- кароткі расповед пра сябе (не больш за 1 000 знакаў);
- абгрунтаванне свайго жадання ўдзельнічаць у курсе.