Агенцтва рэгіянальнага развіцця «Дзедзіч» запрашае хлопцаў і дзяўчат з Берасця і Берасцейскай
вобласці на валанцёрскі летнік “Zalesse summer camp”, які пройдзе ў вёсцы Залессе Камянецкага раёна з
5 па 11 жніўня.
Валанцёрскі летнік – гэта выдатная магчымасць правесці весела і з карысцю 7 летніх дзён. Калі ты
хочаш пакінуць прыемныя ўспаміны пра гэта лета, палепшыць сваё веданне беларускай мовы, адпачыць
ад горада, знайсці новых сяброў, натхніцца, прыдумаць ідэі для нечага новага, пракачаць скілы ў
праектным мэнэджменце і проста цікава правесці час — далучайся!
Як усё будзе адбывацца?
На працягу тыдня ўдзельнікі і ўдзельніцы будуць добраўпарадкоўваць тэрыторыю вакол Дома Еўрапейскіх сустрэч у вёсцы Залессе, дапамагаць у падрыхтоўцы інсталяцый да фестывалю Ulmus.
Таксама ў праграме выступленні крутых экспертаў, культурных дзеячаў і музыкаў, імёны якіх будуць абвешчаныя пазней на старонцы летніка ў ВК. Музычным хэдлайнерам летніка стане гурт РСП, які выступіць з акустычным канцэртам.
Вас чакаюць майстар-класы, гульні, і, канешне, песні ля вогнішча. А трэнінг па праектным мэнэджменце дапаможа ўдзельнікам прыдумляць, пісьменна планаваць і эфектыўна рэалізоўваць крутыя ідэі ў сферы грамадскай дзейнасці.
Колькі гэта каштуе?
Удзел у летніку бясплатны. Трансфер з Берасця да Залесся, пражыванне і харчаванне забяспечваюць
арганізатары.
Якія ўмовы пражывання?
Будынак мае 4 вялікія спальныя пакоі для ўдзельнікаў. Ёсць 2 душа з гарачай вадой, 5 прыбіральняў.
Паколькі яшчэ не ўсе будаўнічыя работы скончаны, няма ложкаў, спаць давядзецца на турыстычных
дыванках і спальніках, якія забяспечваюць арганізатары. Для тых, хто любіць спаць на свежым паветры,
будзе магчымасць раскласці намёт на тэрыторыі летніка.
Хто можа ўдзельнічаць?
Каб патрапіць на летнік, трэба быць авантурным, прыемным, разумным, крэатыўным і вясёлым
чалавекам, які жыве ў Берасці або ў Берасцейскай вобласці. Узроставаыя абмежаванні ад 17 да 25 гадоў.
Адбор удзельнікаў будзе адбывацца праз анкету-заяўку, якую трэба запоўніць да 28 ліпеня па спасылцы. Вынікі адбору ўдзельнікаў стануць вядомыя 1 жніўня.
Усяго ў летнік будзе запрошана 25 хлопцаў і дзяўчат.
Удзельнікі усіх папярэдніх летнікаў у Доме еўрапейскіх сустрэч маюць права ўдзельнічаць у летніку без папярэдняга адбору.