Здзейсніць музычныя мары ў ЗША

Музыкі ва ўзросце ад 19 да 35 гадоў запрашаюцца да ўдзелу ў міжнароднай праграме «OneBeat«. Праграма скіравана на развіццё міжнароднай сеткі творчых, тэхналагічных і сацыяльных інаватараў у галіне музыкі.

Праграма «OneBeat» мае падтрымку з боку Бюро па справах адукацыі і культуры Дзярждэпартамента ЗША і з’яўляецца формай культурніцкай дыпламатыі.

Удзельнікі праграмы змогуць на працягу 1 месяца ствараць, запісваць і выконваць музычныя творы. Праграма дазваляе ствараць арыгінальныя матэрыялы і рэалізаваць новыя музычныя ідэі ва ўласных праектах.

Удзельнікі адправяцца ў гастрольны тур для выканання кампазіцыяў перад шырокай амерыканскай аўдыторыяй у супрацоўніцтве з мясцовымі музыкамі, зладзяць варкшопы для моладзі.

На апошнім этапе праграмы ўдзельнікі падзеляцца планамі на будучыню — па развіцці праектаў у іх родных краінах, па ўмацаванні сеткі сацыяльных прадпрыемстваў у галіне музыкі.

Праграма «OneBeat» — гэта спосаб стварыць новыя музычныя камбінацыі, пасунуць межы музычных тэхналогій і знайсці новыя шляхі ўключэння ўсіх чальцоў грамадства ў працэс музычнай творчасці.

Фінансавыя ўмовы

Арганізатары пакрываюць усе выдаткі ўдзельнікаў, уключна з падарожжам і пражываннем. Таксама прадугледжана фінансаванне паўсядзённых выдаткаў і ганарар у памеры 500 даляраў ЗША.

Прыём заявак ажыццяўляецца па 5 лютага 2016 года. Кандыдаты мусяць зарэгістравацца анлайн.

З дадатковымі пытаннямі, калі ласка, звяртайцеся на гэтую старонку або лістуйце на е-mail 1beat@foundsoundnation.org.

Паводле by.odb-office.eu

Глядзіце таксама: