Пяць прычын адукаваць сябе пра Еўропу


45 хлопцаў і дзяўчат прайшлі курс “Адукуй сябе пра Еўропу” ад Адукацыі.інфо і Фонда ім. Конрада Адэнаўэра ў Беларусі. Трэці набор распачнецца ў верасні. Разам з выпускнікамі курсу мы сабралі для цябе пяць прычын, чаму трэба падавацца на  набор наўпрост зараз.

  1. Незвычайны падыход да навучання

Падчас курса ты не будзеш сядзець днямі за партай. Мы выкарыстоўваем методыку “blended learning”. Гэта значыць, што цябе чакае праца на анлайн-платформе (прыкладна некалькі гадзін на тыдзень) ды жывыя двухдзённыя сэсіі раз на месяц.

Віялета Завадская: Такі мікс, як blended learning, дапамагае замацаваць веды максімальна эфектыўна. Мне гэта падабаецца тым, што спачатку ты разбіраеш матэрыял самастойна, а потым абмяркоўваеш гэта з крутой камандай! А каманда што трэба: вельмі разумныя, цікавыя і крэатыўныя людзі.

Ганна Гаўрушына: Я лічу, што ў сучасным свеце blended learning –  гэта лепшы падыход да навучання. Спадзяюся, што яго хутка пачнуць прымяняць у беларускіх універсітэтах.

  1. Нефармальная атмасфера плюс інтэрактыў

Любіш нефармальную атмасферу? Мы таксама, таму ў нас на занятках менавіта так, і з трэнерамі можна на “ты”. А замест класічных практыкаванняў ты будзеш распрацоўваць міні-праекты, абараняць іх перад аднагрупнікамі ды аднагрупніцамі ды адказваць на іх каверзныя пытанні,  удзельнічаць у дыскусіях і дэбатах ды не толькі!

Святлана Грышкевіч: Курс сабраў тых, хто сапраўды быў гатовы да таго, каб змяніцца самому і ў  разам з тым змяніць увесь мікрасусвет навокал сябе. Таму і атмасфера была цалкам творчая, лёгкая: ідэі на вочных сустрэчах так і лёталі ў паветры! Тым больш, што ўсе хлопцы і дзяўчаты з розных сфер, з розным жыццёвым вопытам – таму на сутыкненні інтарэсаў нараджалася шмат цікавых думак. Ну і ўвогуле вельмі клёва было пашырыць кола сваіх знаёмстваў!

 

  1. Трэнеры, якія таксама прайшлі праз гэты курс

Сярод трэнераў і арганізатараў трэцяга набора ёсць тыя, хто ўжо паспелі адукаваць сябе пра Еўропу. Хто зразумее ўдзельніка лепш, чым той, хто ўжо прайшоў курс?

Алеся Петравец: Пасля гэтага курса хочацца, каб больш моладзі ў Беларусі ведалі даставерныя факты пра супрацоўніцтва Беларусі і ЕС у межах Усходняга партнёрства. А таксама разумелі, як 28 краін успешна функцыянуюць па шэрагу самых разнастайных пытанняў у адным саюзе і асацыявалі Еўрапейскі саюз не толькі з магчымасцю падарожнічаць лоўкостамі і ездзіць у Вільню на шопінг, а таксама з магчымасцямі адукацыі, стажыровак і атрымання прафесійнага досведу ў шэрагу праграм, даступных для беларусаў. Таму мне вельмі прыемна быць сярод арганізатараў трэцяга набора “Адукуй сябе пра Еўропу”.

Выпускнікі і выпускінцы першага набору

  1. Цікавыя магчымасці і прапановы ад арганізатараў курса

Тыя, хто паспяхова скончаць курс, змогуць атрымаць ментарскую падтрымку і мець перавагу пры адборы на мерапрыемствы Адукацыі.Інфо і Фонда Конрада Адэнаўэра ў Беларусі. Так двое нашых выпускінікоў гэтым летам трапілі на study visit у сталіцу Еўрапейскага саюза – Брусэль!

Дзіяна Ляшкевіч: Што можа быць лепш, чым замацаваць атрыманыя веды у сталіцы Еўрапейскага саюза – Брусэлі? Асабліва, калі ты робіш гэта разам з актыўнымі хлопцамі і дзяўчатамі з сямі краін. На практыцы мы даведаліся, як працуюць еўрапейскія інстытуцыі, сустракаліся з супрацоўнікамі Еўрапейскай камісіі, Еўрапарламента і не толькі. А тут ты можаш даведацца, як трапіць на стажыроўку ў Еўракамісію.

 

  1. Знаёмствы ды нэтворкінг, АДУрэнная атмасфера

З табой у групе будзе яшчэ два дзясяткі светлых галоваў. Разам будзем рабіць праекты, выконваць заданні і практыкаванні. Толькі ўяві – тры месяцы з АДУрэннымі людзьмі!

Мікіта Абрамчык: “Выходзь з зоны камфорту” – з такім дэвізам я ўвайшоў ў вялікую каманду ўдзельнікаў курсу. Пачынаючы з эсе і скончваючы фінальным праектам. Тут я знайшоў людзей, якія натхняюць, шмат карыснай інфармацыі і пазітыўных эмоцый. Неверагодна рады быць часткай курса “Адукуй сябе пра Еўропу”.

Не спі ў шапку і станавіся героем або гераіняй трэцяга набору “Адукуй сябе пра Еўропу”. Далучайся і дасылай заяўку да 8 верасня тут!

Глядзіце таксама: