---

Міхаіл Лях – адзін са стваральнікаў і лідэраў навучальнай праграмы TiES.  Гэтая нестандартная праграма ладзіцца ў Мінску і заснаваная на замежным досведзе. Яна створана для амбітных маладых людзей, якія хочуць падвысіць сваю прывабнасць на канкурэнтным рынку працы, падрыхтавацца і ўдала працаўладкавацца.

 – Міхаiл, у чым ідэя праекта? Ці памятаеце Вы, калі і як яна нарадзілася?

– Мяркую, што аніводны заснавальнік ніколі не забудзе, як з’явілася ідэя пра стварэнне чагосьці, да чаго ляжыць яго душа. Усё пачалося з зімы 2013 года, пасля таго, як мы ўжо зладзілі 14 асобных сустрэч з экспертамі ў рамках Progressive Events. Мы рабілі мерапрыемствы для сябе, выбіралі тэмы, якія нам падабаліся, заадно запрашалі ўсіх, каму цікава. Заўважыўшы добрую наведвальнасць і выдатную зваротную сувязь, мы вырашылі рабіць праграму. Той жа зімой 2013-2014 мы прайшлі навучанне і атрымалі галандскае ментарства для TiES. Далей была перамога на міжнародным конкурсе SocStarter і хуткі запуск першага курса.

Зараз мы адкрылі набор і ўжо з пачатку мая пачнецца новы курс TiES U-25, які ўключыць у сябе наш міжнародны досвед, кантакты, напрацаваныя падчас бізнэс-візітаў і стажыровак у другой палове 2014 года. Таксама мы інтэгруем у курс досыць новыя для нашай краіны тэхналогіі і метады навучання, якія выкарыстоўваюцца толькі нямногімі людзьмі ў нашай краіне, такія як ‘трэнінг у стылі коўчынг’ і ‘дызайн-мысленне’. Сваёй праграмай мы ставім мэту спрасціць працэс працаўладкавання для беларускай моладзі.

– Чаму Вы назвалі праект TiES?

– TiES – гальштукі – сімвалізуе прынцып прафесійнага і дзелавога падыходу.

TiES – сувязі – гэта дапамога ў пабудове сувязяў паміж перспектыўнымі маладымі людзьмі і кампаніямі, дзе яны змогуць прафесійна развівацца і рэалізаваць свой патэнцыял і амбіцыі.

Такім чынам, сама назва падказвае патэнцыйным удзельнікам, пра што наш курс.

– Ці падобная вучоба ў праекце да вучобы ва ўніверсітэце?

– Калі вучоба ва ўніверсітэце ў вас асацыюецца са зносінамі і развіццём у коле цікавых і адукаваных людзей, тады – так. Гэта адназначна агульная рыса з нашым курсам. Калі ж успрымаць універсітэт як месца, дзе выкладчыкі ў гадах чытаюць з паперкі сумныя лекцыі пра тое, што ўжо неактуальна мінімум гадоў пятнаццаць, тады, вядома, мы зусім розныя. У TiES упор робіцца на сучасныя і неабходныя веды, якія падаюцца з дапамогай максімальнага ўключэння саміх удзельнікаў у працэс навучання. Пры гэтым мы лічым, што без базы, атрыманай ва ўніверсітэтах, і наш курс будзе менш карысным і эфектыўным, бо патрабуецца наяўнасць пэўнага падмурка ў выглядзе ведаў, уменняў і матывацыі.

 

– TiES стаў пераможцам міжнароднага конкурсу www.socstarter.com. Што для Вас значыць гэтая перамога і якія ўрокі Вы вынеслі для сябе з удзелу ў конкурсе?

– Удзел у конкурсе стаў для нас акселератарам ідэі: мы атрымалі падтрымку ад прадстаўніка ААН у Беларусі, а таксама шмат карысных лакальных кантактаў, якія нам і цяпер дапамагаюць у рэалізацыі TiES. Мы вельмі шмат і старанна рыхтаваліся да выступу ў фінале – і перамаглі. Гэты прынцып мы захавалі і ў падрыхтоўцы новага курсу, таму што ведаем, што зрабіць на высокім узроўні і атрымаць жаданы вынік можна толькі загадзя якасна і сур’ёзна падрыхтаваўшыся.

– Пры гэтым асноўным крытэрам ацэнкі ў працы для нас служыць пытанне: “А ці хацеў бы я сам паўдзельнічаць у такой праграме?”.

– Узнагародай за перамогу стала рабочая паездка ў Амстэрдам. І з таго часу Вы часта бывалі з праектам за мяжой. Чым кантакты, якія ўзнікаюць падчас такіх паездак, карысныя для удзельнікаў праграмы?

У Нідэрландах мы пазнаёміліся з маладымі стартаперамі, якія паспяхова ператварылі сваё хобі ў квітнеючы бізнэс і пры гэтым не паступіліся сваімі прынцыпамі. У Аб’яднаных Арабскіх Эміратах нам удалося пагутарыць з прадстаўнікамі такіх карпарацый, як Microsoft, LinkedIn і Manpower, абмеркаваць тэндэнцыі ў сферы высокіх тэхналогій і развіцця моладзевага рынку працы. У Вялікабрытаніі мы наведалі лонданскія арганізацыі, якія дапамагаюць маладым людзям працаўладкоўвацца, а таксама Універсітэт Оксфарда, навуковую кузню краіны. У выніку, прааналізаваўшы разнастайныя кропкі гледжання і розныя мадэлі развіцця, нам удалося лепш зразумець, у якім кірунку рухацца і што найлепшым чынам можна скарыстаць на практыцы ў Беларусі. А галоўны вынік – гэта адктрыты з 10 па 30 красавіка 2015 года новы набор, у якім мы і плануем выкарыстоўваць замежныя напрацоўкі.

– Якімі якасцямі павінен валодаць патэнцыйны кандыдат?

– Мы хочам бачыць амбітную і мэтанакіраваную моладзь, якая зацікаўлена ў самаразвіцці і матываваная на сур’ёзную працу. Узроставых абмежаванняў не ставім, бо разумеем, што веды, якія мы даем на курсе, будуць карысныя як для студэнтаў, што шукаюць першую працу на няпоўны працоўны дзень, так і для маладых супрацоўнікаў, якія жадаюць падрыхтавацца і змяніць месца працы на больш адпаведнае іх навыкам, дзе яны па-сапраўднаму змогуць рэалізаваць свой патэнцыял. У сітуацыі, калі ўпершыню за апошнія гады колькасць сушукальнікаў значна перавысіла колькасць вакансій, патрабаванні да кандыдатаў усё больш узрастаюць і на высокаканкурэнтным рынку працы толькі падрыхтаваны чалавек мае шанец на вартае і преспектыўнае працаўладкаванне. Для моладзі, у якой практычна няма досведу работы, гэтая сітуацыя становіцца асабліва адчувальнай.

– З якіх этапаў складаецца адбор?

– Спачатку па анкетах мы адбярэм найбольш адпавядаючых патрабаванням кандыдатаў, а пасля – асабіста пазнаёмімся з імі і ў фармаце каманднай офіснай бізнэс-гульні правядзем фінальны адбор.

– Ці цяжка трапіць на праграму? Іншымі словамі, раскройце сакрэт, які быў конкурс на першым наборы.

– Мы атрымалі велізарную колькасць анкет, але яшчэ больш нас уразіла тое, наколькі таленавітыя дзяўчыны і хлопцы выказалі жаданне стаць удзельнікамі праекта. У выніку конкурс склаў 6 чалавек на месца, а нам давялося правесці некалькі вечароў у напружанай дыскусіі аб перавагах кандыдатаў. Тады навучанне было тэставым і таму бясплатным. Зараз бясплатных месцаў усяго тры. Астатнія платныя, хоць сума зусім невялікая – усяго 500 тысяч бел.руб. (прыкладна 35 даляраў, што на самой справе танней за кошт добрай кашулі) за месяц цікавага інтэрактыўнага навучання. Кошт курсу наўмысна зараз прыніжаны, восеньскі набор будзе даражэйшы.

– Ці будзе другі этап чымсьці адрознівацца ад першага?

– Зараз праграма дапрацавана і выразна накіравана на дасягненне мэты – падрыхтаваць удзельнікаў да высокай канкурэнцыі і дапамагчы ім знайсці працаўладкаванне, якое дазволіць максімальна рэалізаваць сябе ў прафесійным плане. Больш за тое, мы ўпэўненыя ў выніках, таму ў выпадку, калі чалавек, які паспяхова скончыў наш курс, палічыць, што курс не каштаваў заплочаных грошай, мы цалкам вернем яму ўсю суму.

– Распавядзіце пра гісторыю поспеху каго-небудзь з першага набору.

– Удзельнікі першага набору першапачаткова былі вельмі разумнымі і таленавітымі, нашай жа задачай было дапамагчы ім у развіцці сваіх навыкаў і лепшым раскрыцці існуючага патэнцыялу. Курс быў накіраваны на павышэнне асобаснай эфектыўнасці, навучанню бізнэс-навыкам і нестандартнаму мысленню і, на думку многіх выпускнікоў, стаў сур’ёзным крокам у іх развіцці. Нягледзячы на ​​тое, што ў папярэднім наборы акцэнт быў зроблены на навучанне бізнэс-навыкам, а не на сувязь з кампаніямі, мы назіраем поспехі нашых удзельнікаў у прафесійным плане: хтосьці змяніў працу ў невялікай кампаніі на падобную пазіцыю, але ў вядомай буйной IT кампаніі, хтосьці цяпер сканчае ўніверсітэт і выбірае паміж некалькімі годнымі вакансіямі ў мінскіх топ-кампаніях, а хтосьці наогул прайшоў вялікі конкурс і паехаў вучыцца за мяжу. Мы плануем і далей адсочваць поспехі нашых выпускнікоў, захоўваць гэтую супольнасць таленавітых людзей і падтрымліваць з імі сувязь.

Каманда www.adukacyja.info жадае праекту TiES далейшага развіцця!